- Divenigi lotita(j)n vorto(j)n:
La ludogvidanto proponas lotitan vorton, aŭ vortoliston, al iu ludanto. Tiu lasta devas precize kaj efike priskribi ĉiun vorton, por ke la kunludantoj (la partneroj) trovu ĝin kiel eble plej rapide. Kompreneble la priskribanto ne rajtas uzi radiko(j)n el la serĉata vorto, nek gesti... La gvidanto kontrolu la gramatikan ĝustecon de la priskriboj, dum kaj/aŭ post la priskribo, kaj ankaŭ povas proponi pli rektajn aŭ efikajn priskribojn.
Por faciligi la taskon de la priskribantoj, precipe tiun de la komencantoj, oni povas decidi, ke ili rajtas elekti ekzemple 5 el 10 lotitaj vortoj. La gvidanto poste povos paroli pri la evititaj vortoj.
Por paroligi ĉiujn, oni interŝanĝu la rolojn: ekzemple post 5 aŭ 10 priskriboj, alia ludanto fariĝas la priskribanto.
Ĉu necesas krei teamojn? mezuri tempon? kalkuli poentojn? ĉu limigi la nombron de ĉies respondoj (por eviti hazardon kaj favorigi la precizecon de la priskriboj)? ĉu la serĉantoj rajtas pridemandi la priskribanton?... Decidu ĉiujn detalajn regulojn antaŭ la komenco.
- Krei frazojn uzantajn la lotitajn vortojn:
Ekzemple ĉiu ludanto lotas 3 vortojn. La celo estas krei unu aŭ plurajn frazojn ligantajn la lotitajn vortojn. La frazoj estu kredeblaj kaj naturaj en iu situacio elektita de la ludanto. La tuto eĉ povas esti mallonga rakonto. Humuraĵoj estas bonvenaj sed la gvidanto kontrolu la gramatikan ĝustecon de la frazoj. Ĉu ĉiuj ludantoj ricevu la samajn vortojn aŭ ĉu ĉiu ricevu apartajn? La gvidanto decidu antaŭ la komenco.